තඩි පිරිමි
දන්නෙම නැතිව මාර්තු නව වෙනිදත් වුණානේ. ඊයේ මාර්තු අට වෙනිදා. ලෝක කාන්තා දිනේනෙ. හැබැයි අපේ අම්මලනම් ඉස්සර ඔය කාන්තා දිනයක් ගැන හාංකවිසියක් දන්නෙත් නෑ. සම තැන නිසි තැන ඉල්ලන්න දන්නෙත් නෑ මයි හිතේ. මොකෝ මට මතකයි අපේ අම්මත් ඉස්සර මුලින්ම ලොකු බත් පිගානක් බෙදන්නෙ තාත්තට. ඊළඟට ඉතින් ලයිස්තුවේ වැඩිමලා හැටියට මට. ඊට පස්සෙ අනුපිළිවෙළින් අනිත් අයට. ඔක්කොටම බෙදලා ආයෙත් මදි පාඩුත් බෙදලා අන්තිමට ඉතුරුවෙන විදියට පොඩි භාජනයකට බෙදාගෙන තමයි අම්ම කන්නෙ. සමතැන ගැන දන්නවනම් තාත්තගෙ සයිස් එකටම අම්මත් පිගානක් බෙදා ගන්න එපායැ. ඉස්සර අම්මලගෙ තිබුණෙ සම තැන නිසි තැන ඉල්ලල සටන් වදින මානසිකත්වයක් නෙවෙයි. පිරිමියාට ගෞරවයයි ආදරයයි ලබාදෙන එක. හැබැයි පිරිමියා මමයි රජා කියලා ලොකු කම් දාන්නෙ නැතුව ඒ විදියටම ගෞරවයයි ආදරයයි රැකවරණයයි කාන්තාවට දෙනවනම් කිසි කරදරයක් නැහැ නොවැ.
මේ කාන්තා අයිතිවාසිකම් ගැන කතා කරන කොට මට මතක් වුණා පහුගිය අවුරුද්දෙ ජූලි මාසෙ අග රටේ නීති හදන එක ගැන අදහස් යෝජනා ගන්න කැඳවල තිබුණ රැස්වීම. මේ අඬහැරය ලිපි මාලාව පටන් ගත්තෙත් ආං ඒ රැස්වීම ගැන ලියලා. කොහොම හරි එදා තරුණ ප්රජාව වෙනුවෙන් අදහස් දක්වන්න මාධ්යවේදිනියක් කියලා කෙනෙකුට අවස්ථාවක් ලැබුණා. හැබැයි එයා කතා කරේ රටේ නීතිය හදන එක ගැන නෙවේ. එයා පුන පුනා කිවුවා අද මෙතනත් ගෑණු තඩි පිරිමින්ට යටවෙලා ඉන්නව කියලා. කාන්තාවො පීඩාවට පත්වෙනවා කියලා. කාන්තා විමුක්තිය හොයන්න ඕන කියලා. තවදුරටත් පිරිමින්ට යටවෙලා ඉන්න බෑ කිවුවා. ඒ වෙනුවෙන් එයා අරගල කරනව කිවුවා. අනේ මන්දා ඉතිං තඩි පිරිමින්ට යටවීම කොහොම වුණත් සීයට පනස්දෙකක් විතර ඉන්න රටේ කාන්තා බලකාය මේ වෙනකොට ප්රධාන තැන් නියෝජනය කරල තියෙනව නොවැ. ඇයි මුල්ම අගමැතිතුමිය බිහිවුණා. ජනාධිපතිතුමියකුත් පත්වුණා. කොළඹ නගරාධිපතිනියත් පත්වුණා. නඩුකාරතුමියන්ලා ඉන්නවා. අමාත්යංශ ලේකම්තුමියන්ලා ඉන්නවා. ආණ්ඩුකාරතුමියන් ඉන්නවා. දිස්ත්රික් ලේකම්තුමියන් ඉන්නවා. ප්රාදේශීය ලේකම් තුමියන් ඉන්නවා. නියෝජ්ය පොලිස්පතිතුමියන් ඉන්නවා. ඒ විතරක්යැ වැඩිපුරම ඉන්නෙ ග්රාමනිලධාරීතුමියන්ලා. පහුගිය ගමේ ඡන්දෙන් ඒ සභාවලට වැඩිපුර පත්වුණෙත් තුමියන්ලා. ඉතින් මෙච්චර තියෙද්දි තව මොකක්ද දන්නෑ තඩි පිරිමියට යට වෙලා තියෙන්නෙ.
මීට අවුරුදු ගානකට කලින් ඒ මාධ්යවේදිනියගෙ පෙලෙන්ති නාමයම තියෙන රැවුල වවපු මහත්තයෙක් කරාපිටියෙ තිබුණු දේශපාලන වේදිකාවකට නැග්ගා. මුලින්ම එයා කිවුවෙ මගේ ගැන හැඳින්වීම නිවැරදි කරනවා මම මේ පක්ෂෙ කෙනෙක් නෙවෙයි කියලා. මෙන්න බොලේ ටික කාලෙකින් මිනිහ ඒ පක්ෂෙන්ම ප්රාදේශීය සභා මන්ත්රී වුණා. ඒපාර කාලෙකට පස්සෙ හිටපු රටේ නායකය එයාගෙ නෑදෑයො කියලා ඒ පැත්තෙන් මන්ත්රී වුණා. ඊට පස්සෙ කට්ටිය රට යවනව කියලා කොලයක් බෙදලා සල්ලි අරගෙන ගෑණු පිරිමි පවුල් පිටින් අමාරුවෙ දැම්මා. ඒකට පොලීසි උසාවි ගියහම බය වෙන්න එපා උඹ ඉදිරිපත් වෙයන් මම බේරගන්නම් කියලා ඒකට වෙන මිනිහෙක් ඉදිරිපත් කොරලා ඒ මිනිහ හිරේටම යවලා ඒ පවුල පිටින් පීඩාවට පත් කොරා. ඒ මනුස්සය මේ ළඟදි තමා නිදහස් වෙලා ආවේ. අන්න ඒ හපන්කම් කොරපු රැවුල වවපු තඩි පිරිමියා එක්ක අර තඩි පිරිමින්ට යටවෙන්න බෑයි කියල බරසාර දේශනයක් කරපු මාධ්යවේදිනිය මොටෝ සයිකලේ නැගල යනවා හම්බවුනා පහුගිය සුමානෙ කහදූවවත්ත හන්දියෙදී. මම හිතන්නෙ කාන්තා විමුක්තිය සොයාගෙන යනව ඇති. අබුද්දස්ස කාලේ ලබුත් තිත්තයි රාළේ කියල තමා කියන්න වෙන්නේ.
එහෙනං ආයුබෝවන්ඩ ගොහිං එන්නං.
ගමරාලගේ අඬහැරය තිස් වන දිගහැරුම.
2023-03-09 බ්රහස්පතින්දා.
No comments:
Post a Comment