ටයිටැනික් - ගමරාලගේ අඬහැරය හතලිස් පස්වන දිගහැරුම.

ටයිටැනික්

පහුගිය දවසක මම ගියා  ඩුබායි රටේ බාබර් සාප්පුවකට. මොකෝ සිරි ලංකාවෙ ඉන්දැද්දි රසායනික ඇත්තෙම නැතුව කාබනිකවලින් සරුවට වැවිල තිබුණ මගේ රැවුලයි කොන්ඩෙයි කපන්න වුණා නොවැ ඒරොප්පෙට එනකොට.  ඉතින් මාසෙකට සැරයක්වත් වැවෙන ටික කපනවා. මෙදා සැරෙත් රැවුල කොන්ඩෙ කපාගෙන මම කිවුවා කන් ගැට්ටෙ තියෙන මයිලුයි ඌරෙක්ගෙ දළ වගේ මේ නාහෙන් එළියට පනින ඒවයි කපන්න කියලා. මේං බාබර් අහපි ජෙල් එකක් තියෙනව ගාන්නද කියලා. මාත් ඉතිං ඔය ඕන මගුලක් අත්හදා බලන්න කැමතියි නොවැ. දෙපාරක් නොහිතා හාං කිවුවා. මේකා භාජනයක් අරගෙන ආවා. ලී පතුරකට ගත්ත උණුකරපු මී ඉටි වගේ මක්කද රස්නෙ පිටම ගෑවා කන් ගැට්ට වැහෙන්නම පුළුන් කූරු දෙකක් අරගෙන ඒකට පුරවල බැස්සුව නාස් කුහර දෙකට. ආයෙ මොනවද ඉතිං මාළු හුස්ම ගන්නව වගේ මාත් කටින් හුස්ම අරගෙන පැය කාලක් විතර ගියාම ඕං ඒකා එකපාරට මගේ කන මිරිකලා අර තට්ටුව ගැලෙව්වා. කනේ මයිල් සේරෝම අරකට ඇලිලා. ඊළඟට බෝස් බෝස් ගාලා නාහෙට බස්සපුව ඇදල ගත්තා මං හිතුවා නාස් පොල්ල ගැලවුනා කියලා. කොහොම හරි නාහෙ මයිලුත් ගුලිය පිටින් ගැලවුනා. මට පුදුම මේකයි. වෙනද ඔය සිරි ලංකාවෙ ඉන්න කාලෙ නාහෙන් මයිලක් දෙකක් එළියට ආවම මං අතින් ඇදල ගලවනවා. එතකොට කදුළු පනිනවා. මෙහේ ඇවිත් ගුලිය පිටින් ගැලෙව්වා එක කඳුලක් ආවෙ නෑනෙ. මං කල්පනා කොරේ කාන්තාරෙ  හන්දා මගේ කඳුළු උල්පත් හිදිලා ඇති කියලා. 

තව ඉතින් කොච්චර මිනිස්සු රටට ඩොලර් යවන්න ඒරොප්පෙට ඇවිත් දාඩිය කදුළු වගුරවනවද? ඒ වුණාට රට පාලනය කොරන එවුන්ගෙ එක දාඩිය පොදක් වැටෙන්න බෑ නොවැ. දැක්කනේ ජාත්‍යන්තර යෝග දිනේ කට්ටියගෙ කෙරුවාව. උං යෝග කොරනවා. ආරක්‍ෂකයො කුඩේ අල්ලන් ඉන්නවා. විලි ලැජ්ජාවෙ බෑ. ඔය ඉස්සර තේරවිල්ලක් අහනවා රෙද්ද අස්සෙ කූරු කූරු මොකක්ද කියලා. උත්තරේ තමයි කුඩය. අන්න ඒ තේරවිල්ල කුඩේටයි  එවුන්ටයි දෙකටම ගැලපෙනවා නොවැ. වෙලාවකට හිතෙනවා මුංට මොලේ උණ හැදිලද කියලා. මොකෝ ඒකට විදින බෙහෙතක් ලංකාවෙ නෑ. ඒක හන්දා මේ දවස්වල මක්කම යන අය යන්නෙ බෙහෙත් විදින්නෙ නැතුව. හැබැයි එහේ සැරටම මොලේ උණ. මක්කම ගොහින් ඔක්කොම මොලේ උණ හදන් ආවොත් බඩුම තමයි. 

මේ දවස්වල ඉස්පිරිතාලවල බෙහෙත් ඇත්තෙත් නෑ. තියෙන්නෙත් බාල ඉන්ජෙක්සන්. ගහපු ගමන් මැරෙනවා. ඒක හින්දා හැමෝම කල්පනාවෙන්. මොකද අරුන්දල නම් සිංගප්පූරුවෙ හරි යාවි. අපිට යන්න වෙන්නෙ කනත්තට තමා. ආං වැලිමඩ ඉස්පිරිතාලෙ නම් ගෙවල් වලටම ගොහින් ලෙඩ්ඩුන්ට ප්‍රතිකාර කොරනවා. ඒක විශිෂ්ට වැඩක්. හැබැයි ඉතින් ඒ දොස්තර මහත්තුරු වෙන තැනකට මාරු කොරාවිද දන්නෑ.  මතකයිනෙ එක සැරයක් හදිසි ලෙඩෙක් අරගෙන දොස්තර මහත්තය ඇම්බියුලන්ස් එක එලෙව්වා කියලා දඩුවම් දුන්නෙ. එහෙව් රටක් සිරි ලංකාව. 

දැන් ඔය ඉස්සර පරාක්‍රමබාහු රජතුමාගෙ කාලේ අපි හාල් නැව් පිටරටත් යැව්වලුනේ. මමනම් ඔය රජතුමා ඉස්සරෝම අඳුන ගත්තෙ දන්ත මුක්ත පැකැට් එකෙන්. ඒකට දැන් තියෙන්නෙ මාර නැවු පුරස්න නොවැ. රටම කාබනික කොරන්න පෝර නැවක් ගෙන්නලා තාම ඇදගෙන නානවා. ගිනිගත්ත නැවේ වන්දිය හොර පාරෙන් වෙන එකෙක් අරගෙන. ඒ අල්ල පනල්ලෙ අපේ රට අද්දරින් තියෙන නැව් යන පාර වෙනස් කොරන්න  හදනවා. බලාගෙන යනකොට වෙනස් නොකර ඉදීද මෙහේ  එවුන් කොරන වැඩ වලට.  අපිට හැමදාම පාඩුයි කියන තෙල් සංස්තාවෙ ලොක්කො එකතු වෙලා තෙල් නැවක්ම ගිලල නොවැ. දැන් අර අත්ලාන්තික්  සාගරේ ගිලුණු ටයිටැනික් නැව බලන්න ගොහින් සංචාරකයො වගයක් අතුරුදහන් වෙලා. ඒක හන්දා අපේ සංචාරක ඇමති වරායට ගොහින් නැව් පිළිගන්නව වගේ සංචාරකයන්ට කිවුවනම් ටයිටැනික් වගේ නොවයි අපේ රටේ නැව් පිටින් ගිලින එවුන් ඉන්නව කියලා. සෑහෙන්න සංචාරකයො ඒවි. ඊට පස්සෙ තෙල් සංස්තාවට එක්ක ගොහින් අරුන්දැල පෙන්නුවනම් සුද්දො පුදුම වේවි. ටයිටැනික් නැව වගේද මෙහේ  නැව් පිටින් ගිලින හනුමන්තලා.  

එහෙනං ආයුබෝවන්ඩ ගොහිං එන්නං.

ගමරාලගේ අඬහැරය හතලිස්  පස්වන දිගහැරුම.

2023-06-22 බ්‍රහස්පතින්දා.