මාගල් - ගමරාලගේ අඬහැරය හතලිස් හත්වන දිගහැරුම.

මාගල්

අස්වැසුමක් ඉල්ලල හැමෝම මොර දෙන කාලේ මට මේක අකුරු කොර ගන්නවත් අස්වැසුමක් නෑ.  යන්තං මේ ටික ගැට ගහගන්නෙත් මලයාලම් සගය එක්ක වාහනේ යන ගමන්. ඔය අපේ අම්මගෙ නමටත් ඉස්සර තිබුණ සමෘද්ධි කාඩ් එකක්. දවසක් මම ගියා මගේ උවමනාවකට ආදායම් සහතිකයක් ගන්න. ඕං කියාපි අර කාඩ් එක තීන හන්දා දෙන්න බෑ කියලා. මං අපේ අම්මට කිවුවා ඕක භාර දෙමු කියලා. උන්දැත් ඉතිං ලේසියකට කැමති වුණේ නෑ. ඇයි සමෘද්ධිය උදා වෙනකම් බලා ඉන්නවනේ. අන්තිමට ශ්‍රමදාන වලට යන්න අමාරුයි කියලා භාර දෙන්න කැමති වුණා. ආං ඒක භාර දුන්නට පස්සෙ අපේ මලයත් ඒරොප්පෙට ගොහින් පනං හතරක් හම්බ කොරලා අපේ ගේ දොර හදා ගත්තා. මාත් සිරි ලංකාවෙ ඔට්ටු වෙලා ඔට්ටු වෙලා ඒරොප්පෙට ආවා. අපේ අම්මත් නිවාඩුවකට මෙහේ ආවා. දැං අපේ පවුලට සමෘද්ධිය උදා වෙලා මයි හිතේ. 

ඇත්තම කතාව දැං ඔය සමහර සමෘද්ධිය තියෙන එවුං වැඩකට පලකට යන්නෙ නෑ. ගෙදර මායිය කොහේ හරි වලං හෝදන්න හරි යවල හයිය හත්තිය තියෙන එවුන් බෝක්කුවක් ඇළක් ගාව මාලු ටිකක් බාලා ඒක කීයකට හරි විකුණලා කරටි කැඩෙන්න ගහල ගෙදර යනවා. එහෙම එවුන් හැමදාම සමෘද්ධිය දීපියව් කියල හර්තාල් කොරනවා. මැරෙනකං දුන්නත් එහෙම තමයි. ඔවුවා මහ එවුන්ම කොරගත්ත දේවල් තමා. ඇත්තටම දෙන්න ඕන පිරිසකුත් ඉන්නවා. මේ වෙලාවට මතක් වෙන්නෙ අර සනත් නන්දසිරි මහත්තය කියපු පද පේළි ටික. ,වයස ගියත් මගෙ අත පය බලාපල්ල යකඩ වගෙයි - මගෙ පපුවත් පත්තු වෙනවා අර ඉපනැලි යාය බලං,

පහුගිය සතියෙ පේරාදෙණිය සරසවිය ගැන කියාපු හන්දා මේ ටිකත් කියන්නම වෙනවා. බලන්න දුන්නා විතරයි මෙවුං ගොහිං ඒකත් විනාස කොරලනේ. තා ඩිංගිත්තෙන් අක්බාර් පාලමත් සමතලා කොරනවලු. අම්මප පුදුම එවුං. මං මේ ඇසළ පෝයට භූත මන්දිර පෙන්නන එවුන්ට දෙකක් කියන්න  හිටියේ. බැලින්නං උන් කොරන වැඩේ  හරි. ඇයි මේ වගේ එවුන්ට හරියන්නේ ඒ වගේ තැන් තමා. 

පෙර කොරපු පිනක් තිබිලද කොහෙද යාන්තං අර ඇතා පණ බේරගෙන ආපු රටටම ගියා. බලන්න එපායැ හැම වින්නැහියක්ම උනාට පස්සේ ඒ රටේ මිනිස්සුම ඇවිත් වෙදකම් කොරලා අරන් යනකොට අපේ කට්ටිය පිරිත් කියනවා. අම්මප බුදු හාමුදුරුවො වැඩ හිටියනම් ඉස්සරහින් හිටගෙන එවුං දිහා බලාගෙන ආටානාටිය සූත්තරේ දේශනා කොරාවි කියලා මට නං ටක්කෙටම හිතෙනවා. 

ඔය ඕන එකෙක් එක එකා දපනෙ දාගන්න පණ වුණත් දෙනව කිවුවට ලංකාවෙ දැනට වැඩියෙන්ම ලේ දන්දීලා තියෙන්නෙ ඇඹිලිපිටියෙ චන්ද්‍රිකා වැවේ මාලු අල්ලල ජීවිතේ ගැට ගහගන්න කෙනෙක්. හැබැයි ඉතිං ඒකට  වටිනකමක් නෑ. මොකෝ උන්දැ දුප්පත් මනුස්සකමින් පොහොසත් මනුස්සයෙක්නේ. ආං ඒකයි. 

සමහර එවුං ගොඩක් සැප පහසුකම් හොයද්දි අර කවුද කිවුව වගේ මැදවච්චිය නෙවේ කිලිනොච්චිය ගමේ ඉස්කෝලෙන් ආං දොස්තර නෝන කෙනෙක් බිහි වුණා. ඉස්කෝලෙ ඩෙස්  බංකු කුඩු කොරන කොට තමන්ගෙ අම්මගෙ මරණෙ මල් ශාලාවෙ තියෙද්දි තරගෙකට ගොහිං ඉස්කෝලෙ ගෞරවේ බේරපු දරුවෙක් දැක්කා. හැබැයි එවුවට ලොකු ප්‍රචාරයක් නෑ. හැබැයි මෙහෙම දැම්මනං මරා දැමූ සිසුවියගේ නිරුවත් සිරුර හමුවේ ආං හොඳ ප්‍රචාරේ ඒක විකුණගෙන කන්න පුළුවන්. මේං අලුතෙන්ම එකක් දාලා තියෙනවා සුරූපී තරුණිය රහස් පෙදෙසේ සඟවාගෙන ආ රත්තරං ගුවන් තොටේදී අහුවේ කියලා. ඔන්න ඉතිං අරක පීරනවා. මොකෝ රත්තරං බලන්නෙයි නෑ රහස් පෙදෙස තීද කියල බලන්න. ඉතිං අරුං හම්බ කොරනවා කියල වැඩක් නෑ. 

මෙච්චර දිගට ලියන කොට කියයිද දන්නෑ මාගලක් වගේ කියලා. ඉස්සර අපේ පැත්තෙ මාගල් වියන්නෙ පොල් කොල තම්බල වේලලා. ඒ මාගල් සෑහෙන්න දිගයි. ඒවා බිම දාලා තමා වී වේලන්නෙ. දැන් නම් ඔය බිම දිගාරිනවා කියන්නෙ වෙන මාගල් ජාතියක් නොවැ. අනේ කාලේ වනේ වාසේ.

එහෙනං ආයුබෝවන්ඩ ගෙහුං එන්නං.

ගමරාලගේ අඬහැරය හතලිස් හත්වන දිගහැරුම.

2023-07-06 බ්‍රහස්පතින්දා.