උපවාසය
ගමේ කෝපි කඩේ දෙන්න දෙපැත්තේ දාං අදින්නේ
ගැටව් කතා බහට කඩ එළිපත්තේ රංචු ගැහෙන්නේ ,
මේ සිංදුවට අවස්ථා කීපයකම ගමරාළගෙ රංගනයක් ඉදිරිපත් කොරා නෙව. ඉතිං ඒ සිංදුව විතරක් නෙවෙයි බොහොමයක් අර්ථවත් සිංදු බරසාර හඬින් කියල අපේ මනදොල සපුරපු මහඇදුරු සනත් නන්දසිරි මහත්තයත් දෑත ලයේ බැඳ නොකියාම ගොහිල්ල නොවැ. එතුමාට නිවන්සුව ලැබේවා කියලම පටන් ගනිමුකො.
මාර්තු 27 ලෝක නාට්ය දිනේ නොවැ. ඉතිං නාට්ය උණ මටත් තියෙන හන්දා ඒ ගැනත් කියන්නම වෙනවා. අපේ තාත්තගේ ගම වෙච්චි ගිංතොට ඒ කාලෙ පොල් කොටන් වේදිකාවෙ නටා්යවල තාත්තා රඟපාල තියෙනව නොවැ. හැබැයි ඉතිං එයාගෙ වේදිකා රංගනය අපට බලන්න නම් වුණේ නැහැ. අපි දැක්කෙ ගෙදර ගෘහමූලිකය හැටියට කොරපු රඟපෑම් තමා. කොහොම හරි අප්ප කළ දේ පුතා නොකලොත් නොට්ටිගෙ පුතා කියන හන්දද කොහෙද ඔය නාට්ය උණ මටත් තිබුණ නොවැ. ඒකට කවුරුත් මඟ පෙන්නුවෙ නෑ කොහොම කරනවද කියලා. මට අවබෝධයක් තිබුණෙත් නෑ.
ඉතිං අපි ඉස්කෝලෙ යන කාලෙ ගොඩකන්දෙ ජයන්ත කළ්යාණන්ද මහත්තයා පුබුදු කලා කවය කියල එකක් හදාගෙන ගමේ කට්ටිය එකතු කොරගෙන වේදිකා නාට්ය පෙන්නුවා. ආං ඒක තමා ඒ කාලෙ බැලුවෙ. රජ කතාවක් පෙන්නනවා. ඊට පස්සෙ විහිලු කතාවක් පෙන්නනවා. ඒ සමහර ඒවයි දෙබස් සිංදු තාමත් මතකයි නොවැ. ලොකු සෙනඟක් පිරෙනව ඒක බලන්න. ඩිංගක් දැඩි වුණාට පස්සෙ බයිසිකල්වලින් ගිහින් හැමතැනම තිබුණු නාට්ය බැලුව නොවැ.
කොහොමින් කොහොම හරි මගේ රඟ පෑමේ ආශාව ඉෂ්ට කරගන්න පාර පෙන්නුවෙ මැදවල පර්සි කේ. ජයතිස්ස ගුරුතුමා. රඟපෑම විතරක් නෙවේ මොන පුරස්නෙ ආවත් නොසැලී ජීවත්වෙන විදිය එතුමා කියලා දුන්නා. ඒකට ඉතිං සදා ණයගැතියි. ඉතිං ඒරොප්පෙ ඉඳගෙනත් එතුමාට දීර්ඝායුෂ ප්රාර්ථනා කොරනවා. ඒ වගේම හෙළයේ ඉතිහාසය ගැන බරසාර පොතක් ලියපු ජයන්ත දහනායක මහත්තයා එයාගෙ කුවේණි ඉපදිලා නාට්යයේ ප්රධාන චරිතය මට දීලා ලබාදුන්නු අවස්ථාව ගැනත් ගෞරවය පුද කරනවා. ඕං තව ඉතිං නාට්ය ගැන කතා තව ගොඩක් තියෙනවා. ඒවා තව ඉස්සරහට කියමුකො.
අප්රේල් 01 වෙනිදත් ළඟ ළඟම එනවනේ. ඉස්සර ඉදන් අපේ එවුන් ඔය දිනේ මෝඩයගෙ දිනේය කියල එකේක අලඟු දෙනවනේ. උදේ පාන්දරම මොකක් හරි ගජ බින්නයක් ඇඳබානවා. එකපාරක් ගුවන්විදුලියෙන් පළවෙනිදා බොරුවක් කියල හෙන ලෙඩක් දාගත්තනේ. මං හිතන්නෙ මෝඩයගෙ දිනේ කියල එක දිනයක් මදි. මොකෝ ඒ තරමට අපි කොරපු මෝඩකං තියෙනව නොවැ. ඉතිං තුන්සිය හැටපස් දවසෙන් වැඩි හරියක් මෝඩයගෙ දින තමා.
ඒරොප්පෙ හිටං මෙදා සැරේ මේ ටික ලියන්නෙ රාමසාන් හඳ බල බල. මොකෝ ඉස්ලාම් භක්තිකයන්ගෙ රාමසාන් උපවාසෙ. ලංකාවෙ හිටියනම් මේ දවස්වල අනිවාර්යයෙන්ම නෝම්බි කැඳ හම්බ වෙනවා. ඒකෙ රස නම් කියල වැඩක් නෑ. මෙහේ නම් නෝම්බි කැඳ නෑ. එක එක ජාති දාලා රෑට කන බත් එකක් නම් හම්බ වුණා. හැබැයි ඉතිං දවල් උපවාසෙ කාලෙට පාර තොටේ කාල බීලා අහුවුණොත් කෙලින්ම පොලෝසියෙ තමයි නවතින්න වෙන්නෙ. මෙහේ උපවාසෙ එහෙමයි. කරනවනම් හරියටම කොරන්න ඕන.
ඒකට ලංකාවේ. තෙල් නොබෙදා උපවාසෙ. හැබැයි ඒ ගමන් එයාල කනව, බොනව, බෝල ගහනව ඔක්කොම කොරනවා. තෙල් ගහන්න යන මිනිස්සුන්ට තමා වතුර උගුරක්වත් නැතුව පෝලිංවල ඉඳගෙන උපවාස කරන්න වෙන්නෙ. ලක්ෂ ගණන් පඩි ගන්න මිනිහ ගන්නවා. තැලෙන එකා හැම එකෙන්ම තැලෙනවා. හනේ මෙහෙමත් උපවාස.
එහෙනං ආයුබෝවන්ඩ ගොහිං එන්නං.
ගමරාලගේ අඬහැරය තිස් තුන්වන දිගහැරුම.
2023-03-30 බ්රහස්පතින්දා.
