කොරල් - ගමරාලගේ අඬහැරය හතලිස් තුන්වන දිගහැරුම.

කොරල් 

පහුගිය සතියෙ කට්ටිය පන්සල් වලට වඩා උනන්දුවෙන් දන්සල්වලට නම් ගොහින් තිබුණා නොවැ. බලන්න එපායැ  හැම හන්දියකම උතුරන්න සෙනග. ගොඩක් කට්ටිය වේලාසනින්ම හනි හනිකට පන්සලකට ගොහින් මල් පොකුරකුත් අතේ තියාගෙන ගහනව සැල්පියක්. දානවා අන්තර්ජාලෙට. දැන් ඉතිං නිවන් යන එක ශුවර්. මොකෝ උන්දැල පන්සල් ගියා කියලා මේ ලෝකෙ විතරක්යැ දිව්‍ය ලෝකෙත් දන්නව ඇතිනේ. ඊට පස්සේ හනිකට දුවන්නෙ දන්සලට. එතැනට ගිය ගමන් වට පිට බලන්නෙ අඳුරන එකෙක් ඉන්නවද කියලා පිටිපස්සෙන් ඇතුළට පැන ගන්න. ඊට  පස්සෙ අනිත් එවුන් පෝලිම් පැනපු එකයි අර ගෑනි ඇඳන් හිටපු එකයි කෑම වල ලුණු මිරිස් ගැනයි කතා කොර කොර ගෙදර යන කොට පෝය ගෙවිලත් හමාරයි. සමහර දන්සල් ගාව ඕං මරාගන්නව පෙන්නුවා. ඇයි හැමෝම නාලාගිරිල වගේනේ. චුල්ලහත්ථිපදෝත්තම සූත්තරය ගැන වගේ වගක් නැහැ නොවැ. 

ඒ අස්සෙ දැක්කනේ අර ලෝක පරසිද්ද බි්‍රතාන්‍ය ජාතික හාමුදුරු නමක් ගුවන් තොටුපලේ පැය ගාණක් තියලා අඩියෙන් අඩියට තුවක්කු කාරයො දාගෙන අගමැතිතුමා ලෝක සමුළුවකට ගොහින් නොවැ. ඒකෙන්  ඉතිං ලොකු වටිනාකමක් ලැබුණ නොවැ. වැඩේ උණාට පස්සෙ ඒ ගැන පරික්‍ෂණ කොරනව කිවුවහම උන්වහන්සේ කියල තියෙන්නේ මම එච්චර ලොකු කෙනෙක් නෙවෙයි ඒක හන්දා පරික්‍ෂණ එපා. ආයෙ එහෙම දෙයක් නොවෙන්න වග බලාගන්න කියලා. බලන්න තියෙන නිහතමානීකම. අපේ නම් කොහොමද? රාජ්‍ය අනුග්‍රහය ඕනමයි කියලා යුද්ධ ප්‍රකාශ කොරාවි නේ. 

පහුගිය දවසෙ පරිසර දිනෙත් තිබුණනේ. ඉතිං  හැම අවුරුද්දෙම ඔය දිනේට කැමරා ටිකක් අල්ලගෙන ලෝකෙට පේන්න පැල ටිකක් හිටවනවා. එහෙම නැත්තන් අපේ සල්ලි තව වියදම් කොරලා තඩි බෝඩ් ගහලා පයිල් කවර ගහලා පරිසර ව්‍යාපෘතියක් කියලා ලස්සන නමක් දාලා මොකක්  හරි පටන් ගන්නවා. අනිත් පැත්තෙන් දේශපාලන හයි කාරයො එක කෙළියට කැලෑ කපනවා, පස් කපනවා, වැලි ගොඩදානවා, ගං  ඉවුරුවල හෝටල් ගහනවා. මේ එකක්වත් අඩුවක්  නැහැ නොවැ. අඩු ගානෙ ඔය පරිසර දිනේ කැමරා ටිකත් අටෝගෙන ගොහින් බැලුවනම් උසාවියෙන් කියපු විදියට බදුර්දීන් උන්නැහේ ගස් කීයක් හිටවලද කියලා. කොහොම වුණත් එව්වා අධිකරණෙට අපහාස නෙවෙයි උපහාසෙන් බලා ඉන්න තමා වෙලා තියෙන්නේ.  

දැන් ඉතිං අද ලෝක සාගර දිනේ. අද විතරක් ඒ ගැන කතා කොරයි. ඊට පස්සෙ නැව් ගිනි අරගෙන නෙවෙයි මොන විනාසයක් වෙලා ඕක දූෂණය වුණත් කොරන්න දෙයක් නෑ. මොකෝ ලොකු පුටුවල උගත්තු කියලා කට්ටිය හිටියට මොකක් හරි වුණාට පස්සෙ තමා එයාල ඒ ගැන තියෙන නීති රෙගුලාසි හොයන්නේ. ඊට කලින් ඔය දැලේ  හිල් අස්සෙන් රිංගල ගොහින් මොකෙක් හරි ඒකෙන් ගත මනාවක් හොයා ගන්නව නොවැ. ඊට පස්සෙ ඉතිං අරුන් කොරන්නෙ අස්සය ගියාට පස්සෙ ඉස්තාලෙ වහල දාන වැඩ තමා. 

පහුගිය දවසක මම ගියා නොවැ ලෝකෙ උසම කුළුණ වෙච්චි  ඩුබායි බර්ට් කලීෆා කුළුන යට තියෙන මින් මැදුර බලන්න. කියල වැඩක් නෑ. මහ තඩි තෝරු මෝරු ඔක්කොම ඉන්නව නොවැ. යටින් යනකොට ඔළුව උඩින්  පීනගෙන යනවා වවුල්ලු පිහාඹන්න වගේ. ඒක ඇතුලේ කිමිදෙන්නත් පුළුවන්. කොහොම හරි මේ දෑස පින් කොරලා තිබුණා මේව හැබැහින් බලාගන්න. 

ඉස්සර ලෝකෙ පුරා මිනිස්සු ලස්සනම කොරල් පර  බලන්න එන්නේ හික්කඩුවට නොවැ. සමහර එවුන් කොරල්පර බලන්න ආපු සුද්දන්ට කුකුල් පොර පෙන්නලා පොඩි එවුන් වික්ක මිසක් කොරල් පර රැකගන්න වැඩ පිළිවෙළක් තිබුණෙ නෑ මයෙ හිතේ. කොහොම  වුණත් ඕං ඩුබායි රටේ ලෝකෙ ලොකුම කෘතීම කොරල්පර උද්‍යානෙ හදන්න පටන් ගත්ත නොවැ. ඊට පස්සෙ ඉතිං ලෝකෙ කොරල් පර බලන අය ඔක්කොම මෙහේ ආවොතින් අපිට හුප්පෙ තමා.   

එහෙනං ආයුබෝවන්ඩ ගොහිං එන්නං.

ගමරාලගේ අඬහැරය හතලිස් තුන්වන දිගහැරුම.

2023-06-08 බ්‍රහස්පතින්දා.